Upplýsingavefur um vegbætur í Mýrdal

Þú ert hér: Forsíða

Nýtt

Mest lesið

Umsagnir um tillögu að aðalskipulagstillögu Mýrdalshrepps 2012-2028.

Skrifað af: Kjartan Jónsson

Þriðjudagur, 22. nóvember 2011 16:54

Frestur til að gera athugasemdir við tillögu að aðalskipulagi Mýrdalshrepps 2012-2028 rann út 4. maí 2012.

Upplýsingar um aðalskipulagstillöguna er að finna á www.vik.is.

Í umsögn sem sex einstaklingar hafa skrifað er gott yfirlit yfir helsta bitbein skipulagstillögunnar, þ.e. færslu Hringvegar. Yfirlit yfir forsögu skipulagsmála í Mýrdal og stöðu þeirra í dag er að finna hér.

Umsagnir verða birtar á vefnum, með leyfi höfunda. Sendið umsagnir á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. ef þið viljið fá umsögn ykkar birta á www.myrdalur.is.

Umsagnir:

Sex einstaklingar sem eru íbúar og eigendur fasteigna og lands í Mýrdalshreppi

Viðhengi:
Skrá	Lýsing	Skráarstærð
Umsögn um aðalskipulagstillögu Mýrdalshrepps 2012-2028 maí 2012		1054 Kb

Síðast uppfært: Laugardagur, 05. maí 2012 21:10

Sveitarstjórn Mýrdalshrepps auglýsir tillögu að Aðalskipulagi Mýrdalshrepps 2012-2028

Skrifað af: Kjartan Jónsson

Sunnudagur, 15. apríl 2012 09:52

Tillagan ásamt fylgigögnum verður til sýnis á skrifstofu Mýrdalshrepps, Austurvegi 17, 870 Vík og hjá Skipulagsstofnun, Laugavegi 166, Reykjavík frá og 19. mars til og með 4. maí. Tillöguna má einnig skoða á heimasíðu Mýrdalshrepps, www.vik.is.

Þeim sem telja sig eiga hagsmuna að gæta er gefinn kostur á að gera athugasemdir við tillöguna. Frestur til þess að skila inn athugasemdum er til og með 4. maí n.k.

Skila skal skriflegum athugasemdum til sveitarstjóra Mýrdalshrepps á netfangið Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. eða til skrifstofu Mýrdalshrepps, merkt Aðalskipulag Mýrdalshrepps.

Skipulagsmál í Mýrdal, forsaga og staðan í dag

Skrifað af: Kjartan Jónsson
Sunnudagur, 15. apríl 2012 15:32
Í aðalskipulagstillögunni sem nú er í umsagnarferli er gert ráð fyrir færslu Hringvegar suður fyrir Geitafell, að bökkum Dyrhólaóss, í göng undir Reynisfjall og á fjörukamb Víkurfjöru fyrir sunnan Víkurþorp. Ákvörðun um þetta var tekin síðla árs 2005, en þá hafði endurskoðun aðalskipulagsins staðið frá árinu 2001. Vinna við skipulagsgerðina hélt áfram næstu 5 ár, en breytt veglína komst þó ekki inn á núgildandi aðalskipulag Mýrdalshrepps 2009-2025. Ástæðan var formgalli í meðferð málsins í sveitarstjórn þar sem oddviti reyndist hafa verið vanhæfur, með vísan til sveitarstjórnarlaga, við afgreiðslu tillögunnar á sveitarstjórnarfundi. Í bréfi Skipulagsstofnunar til umhverfisráðherra þann 3.5.2010 benti stofnunin á annan formgalla, sem var skortur á upplýsingum um áhrif vegarins á náttúru og samfélag í Mýrdal. Þar var vísað til stjórnsýslulaga. Þann 14.10.2010 kynnti umhverfisráðherra í bréfi til oddvita Mýrdalshrepps þá niðurstöðu ráðuneytisins að það synjaði, með tilvísun til vanhæfis oddvita, staðfestingar þeim hluta aðalskipulags Mýrdalshrepps 2009-2025 sem varðar veglínu þjóðvegar nr. 1. Aðrir hlutar skipulagsins voru staðfestir og tók það gildi þann 22.12.2010. Miklar deilur hafa verið frá upphafi í sveitarfélaginu um færslu vegarins og í sveitarstjórnarkosningum 2010 var veglínan helsta kosningamálið. Úrslit voru þau að B-listi Framfarasinna (fylgjandi veglínu) hlaut 198 atkvæði og 4 menn kjörna, E-listi Einingar (andvígur veglínu) hlaut 89 atkvæði og einn mann kjörinn, og H-listi Hamingjusamra hlaut 49 atkvæði. Núverandi meirihluti er ákveðinn í að knýja í gegn nýja veglínu. Á fundi sveitarstjórnar Mýrdalshrepps, haldinn mánudaginn 29.11. 2010, var áréttað að endurskoða skyldi Aðalskipulag Mýrdalshrepps 2009 – 2025 sem sveitarstjórnin hafði þá nýlega samþykkt og sent ráðherra til staðfestingar: „Sveitarstjórn leggur áherslu á að endurskoðun skipulagsins taki mið af fyrri samþykktum sveitarstjórnar Mýrdalshrepps um að nýr vegur um Mýrdal verði á nýju skipulagi sem næst veglínu 3“. Vorið 2011 var samið við verkfræðistofuna VSÓ Ráðgjöf um endurskoðun aðalskipulags sveitarfélagsins. Drög að nýju aðalskipulagi 2012-2028 voru kynnt á íbúafundi 3.11.2011 og bárust ábendingar og athugasemdir frá 39 einstaklingum og félagasamtökum og 7 umsagnir frá lögbundnum umsagnaraðilum. Hluti þeirra er hér. Meðal þeirra sem leggjast eindregið gegn veglínunni eru Vegagerðin, Umhverfisstofnun, Samtök verslunar og þjónustu - flutningasvið, Landvernd, Fuglavernd, félagar í samtökum íbúa og hagsmunaðila í Mýrdal, bændur sem eiga lönd sem veglínan fer um, auk fjölmargra einstaklinga með ólíka hagsmuni. Sveitarstjórnin sendi drögin, að teknu tilliti til athugasemda, til Skipulagsstofnunar þann 11.1.2012, og eru hennar athugasemdir hér. Sveitarstjórn hefur nú yfirfarið framkomnar ábendingar og athugasemdir og auglýst tillögu að nýju aðalskipulagi 2012-2028. Tillagan ásamt fylgigögnum verður til sýnis á skrifstofu Mýrdalshrepps, Austurvegi 17, 870 Vík og hjá Skipulagsstofnun, Laugavegi 166, Reykjavík frá og 19. mars til og með 4. maí. Tillöguna má einnig skoða á heimasíðu Mýrdalshrepps, www.vik.is. Frestur til þess að skila inn athugasemdum við tillöguna er til og með 4. maí. Ferill tillögunnar skv. skipulagslögum, 32. grein, er síðan þannig að þegar frestur til athugasemda er liðinn skal sveitarstjórn fjalla um tillöguna á nýjan leik. Í þeirri umfjöllun skal taka afstöðu til athugasemda sem borist hafa og þess hvort gera skuli breytingar á tillögunni. Þegar sveitarstjórn hefur samþykkt tillögu að aðalskipulagi skal sveitarstjórn senda Skipulagsstofnun tillöguna, ásamt athugasemdum og umsögn sveitarstjórnar um þær. Skipulagsstofnun skal innan fjögurra vikna frá því að tillaga að aðalskipulagi barst henni staðfesta aðalskipulagstillöguna og auglýsa hana í B-deild Stjórnartíðinda. Telji Skipulagsstofnun að synja beri aðalskipulagi staðfestingar eða fresta staðfestingu þess að öllu leyti eða hluta skal hún senda tillögu um það til umhverfisráðherra innan fjögurra vikna frá því að henni barst tillaga að aðalskipulagi. Skal tillagan rökstudd með greinargerð þar sem fram skal koma hvort form- eða efnisgallar séu á afgreiðslu sveitarstjórnar eða gerð skipulagsins. -------------------------- Hér að neðan er veglína 3 skv. núverandi skipulagstillögu sýnd á tveimur kortum. Á fyrra kortinu er hluti sveitarfélagsuppdráttar sem sýnir veglínuna vestan Reynisfjalls, að viðbættum skýringum með rauðum texta. Seinna kortið er tekið úr umhverfisskýrslunni og sýnir votlendið sem veglína 3 fer um. Núverandi veglína og veglína 3 skv. aðalskipulagstillögu: Veglína 3 skv. aðalskipulagstillögu og votlendi sem hún þverar:
Síðast uppfært: Þriðjudagur, 17. apríl 2012 19:52

Svar Vegagerðarinnar við athugasemdum Mýrdalshrepps frá 27. janúar

Skrifað af: Kjartan Jónsson

Þriðjudagur, 03. apríl 2012 12:17

Í fundargerð sveitarstjórnar Mýrdalshrepps frá 22. mars er fjallað um svar Vegagerðarinnar við athugasemdum Mýrdalshrepps frá 27. janúar.

Svar Vegagerðarinnar, dagsett 14. febrúar 2012, fer hér á eftir. Afrit af svarinu er í viðauka.

Mýrdalshreppur
Ásgeir Magnússon, sveitarstjóri
Austurvegi 17
870 VÍK

Efni: Aðalskipulag Mýrdalshrepps, 2012 - 2028

Vegagerðin hefur móttekið erindi ykkar dags. 27. janúar sl. þar sem farið er vinsamlegast fram á að afstaða Vegagerðarinnar sem lýst er í athugasemdum við drög að aðalskipulagi Mýrdalshrepps í bréfi dags. 16. nóvember sl., verði tekin til endurskoðunar. Eru ástæður fyrir því raktar í fimm töluliðum.

1.
„Vinnubrögð stofnunarinnar í þessu máli eru ámælisverð. Í því sambandi skal á það bent að athugasemdir Vegagerðarinnar ásamt skýrslu þeirri sem með fylgdi voru birtar á heimasíðu andstæðinga veglínunnar áður en þau gögn bárust sveitarstjórn Mýrdalshrepps“.

Vegagerðin vísar á bug ásökunum um ámælisverð vinnubrögð í þessu máli. Vegagerðinni er skylt að láta af hendi opinber gögn eins og þessi, þó vissulega sé eðlilegt að gæta þess að þau berist fyrst til þess aðila sem þau eru stíluð á eins og gert var í þessu tilviki. Umsögn Vegagerðarinnar sem dagsett er 16. nóvember 2011 var póstlögð 17. nóvember. Umsögnin var send fulltrúa samráðshóps íbúa og hagsmunaaðila í Mýrdal með tölvupósti 29. nóvember eða 12 dögum síðar. Í millitíðinni fékkst staðfesting á því að umsögnin hefði borist sveitarfélaginu.

2.
„Skýrsla sú sem starfsmenn Siglingastofnunar Sigurður Sigurðarson og Pétur Sveinbjarnarson hafa unnið og að hluta til er byggt á er í hrópandi ósamræmi við athugasemdir þær sem stofnunin sjálf, Siglingastofnun gerir við aðalskipulagið. Í staðinn er slengt fram fullyrðingu sem svo hefur verið étin upp af Vegagerðinni og einnig stórum hluta andstæðinga veglínunnar um að „Ströndin framan við Vík sé eins langt frá því að vera í jafnvægi sem verið getur. Því sé töluverð óvissa um það hvar ströndin nái jafnvægi, hvort náist að stöðva rofið við núverandi sjávarkamb eða við varnarlínuna sem er nokkrum tugum metra innar.“ Þessi hæpna fullyrðing er svo notuð sem helstu rök Vegagerðarinnar fyrir andstöðu við fyrirhugaða veglínu.“

Þar sem hér er um mjög veigamikla ákvörðun að ræða að velja Hringveginum framtíðar staðsetningu á sandströnd sem hefur verið í ójafnvægi og utan við áður skilgreinda varnarlínu, leitar Vegagerðin að sjálfsögðu álits hjá þeirri stofnun sem mesta sérfræðiþekkingu hefur á þeim málum og styðst við þær upplýsingar sem þar koma fram við ákvarðanatöku sína. Vegagerðinni er ekki kunnugt um að breytingar hafi orðið á áliti Siglingastofnunar á ástandi sandfjörunnar eftir að umrædd skýrsla var gerð.

3.
„Hvorki í athugasemdum Vegagerðarinnar né í viðhengi Siglingastofnunar er minnst á áform Siglingastofnunar og Mýrdalshrepps um strandvörn sunnan Víkurþorps. Hvergi er heldur minnst á það að nú þegar hefur sandfangarinn sem byggður var s.l. sumar sannað gildi sitt og að honum og í Víkurfjöru hefur safnast mikill sandur sem svo verður græddur upp.“

Á bls. 3 í skýrslu Siglingastofnunar kemur fram að í fyrstu hafi verið stefnt að byggingu ölduvarnar með grjótgarði eftir fjörunni í varnarlínunni sem skilgreind var á árunum 1992 – 1995 en að eftir nokkra athugun hafi verið söðlað um og byggður sandfangari út frá ströndinni við Víkurá. „Hlutverk þessa sandfangara er að verja ströndina þannig að rofið nái ekki varnarlínunni. Vegstæði það sem verið er að skoða er í skýrslu þessari er utan við varnarlínuna. Við íþróttavöllinn er veglínan um 25 m utan varnarlínu.“ Komið hefur fram í samtölum við starfsmenn Siglingastofnunar að þó svo að sandur safnist fyrir tímabundið, sé ekki víst að það verði til langframa. Þekkt er að sandur safnast saman í fjörunni tímabundið en svo gengur á í annan tíma. Ráða þar mestu ríkjandi vindáttir. Vonandi verða þó áhrif sandfangarans þau að sandur safnast upp til framtíðar og jafnvægi komist á strandlengjuna.

4.
„Í athugasemdunum er vísað til þess að ný veglína sé umdeild, sem rök fyrir því að fallast ekki á tillögu sveitarstjórnar. Nú er það svo að fáum ætti að vera það ljósara en Vegagerðinni að um allar eða a.m.k. flestar stórar framkvæmdir eru skiptar skoðanir. En það er sveitarstjórnarinnar að fara með skipulagsvaldið og taka ákvarðanir sem hún telur réttastar og bestar út frá heildarhagsmunum sveitarfélagsins og það jafnvel þó ágreiningur sé um framkvæmd.“

Það er vissulega rétt að sveitarfélagið fer með skipulagsvaldið en Vegagerðin sem framkvæmdaraðili ber einnig samfélagslega ábyrgð og þarf að huga að góðri sambúð vegar og umferðar við umhverfi og íbúa, sem er eitt af markmiðum Vegagerðarinnar. Mat á umhverfisáhrifum framkvæmdarinnar mun taka betur á þessum þáttum þegar og ef til þess kemur.

5.
„Þó svo hvorki Vegagerðin né sveitarstjórn Mýrdalshrepps geti sagt til um það með nokkurri vissu hvenær ráðist verði í stórar framkvæmdir í vegagerð, þá verður að teljast líklegt að nokkur tími líði þar til hægt verður að ráðast í þá framkvæmd að byggja nýjan láglendisveg um Mýrdal. Á þeim tíma mun enn frekar en orðið er koma í ljós hver áhrif sandfangarans nýja í Víkurfjöru verða. Sanni hann gildi sitt eins og hann hefur gert í öllum þeim óveðrum sem á honum hafa dunið undanfarna mánuði, munu þrengsli milli mannvirkja í Vík og sjávar ekki standa í vegi fyrir þessari veglínu.“

Vegagerðin tekur undir að rétt sé að láta tímann leiða í ljós á einhverjum árum hvort áhrif sandfangarans verða þau sem vonir eru bundnar við og að jafnvægi náist á strandlengjuna nokkrum tugum metra utan við núverandi skilgreinda varnarlínu, þannig að hægt sé að koma Hringveginum fyrir á öruggu svæði milli strandar og íþróttasvæðisins eins og vilji heimamanna stendur til. Hinsvegar væri mjög óábyrgt nú áður en þessi reynsla liggur fyrir að velja Hringveginum stað utan skilgreindrar varnarlínu. Auðvelt ætti að verða að breyta aðalskipulagi ef og þegar þar til bærir sérfræðingar í framtíðinni telja það óhætt.

Í ljósi nýrra upplýsinga um grjóthruns- og snjófljóðahættu á leið ofan byggðar og við jarðgangnaleið næst sjónum telur Vegagerðin að ekki sé tímabært að endurskoða fyrri afstöðu til skipulagshugmynda sveitarfélagsins, en ákveðið hefur verið að láta vinna frekari athuganir á þessum veglínum og fá ítarlegra mat á ofanflóðahættu og möguleikum til að verjast þeirri hættu.

Rétt er að lokum að ítreka mikilvægi þess að í aðalskipulagi sé gert ráð fyrir nauðsynlegum endurbótum á Hringveginum um Gatnabrún til þess að auka umferðaröryggi og greiðfærni en fyrirhugað er að ráðast í þær innan fárra ára.

Virðingarfyllst,

Svanur G. Bjarnason
Svæðisstjóri Suðursvæðis

Viðhengi:
Skrá	Lýsing	Skráarstærð
brefvegagerd.pdf		200 Kb

Síðast uppfært: Sunnudagur, 29. apríl 2012 15:01

Athugasemdir Skipulagsstofnunar við tillögu að Aðalskipulagi Mýrdalshrepps 2012-2028

Skrifað af: Kjartan Jónsson

Þriðjudagur, 28. febrúar 2012 06:59

Skipulagsstofnun hefur, sbr. 30. grein skipulagslaga, sent Mýrdalshreppi athugasemdir við tillögu að Aðalskipulagi Mýrdalshrepps 2012-2028, sem stofnuninni barst þann 16 janúar. Stofnunin gerir fjölmargar athugasemdir við málsmeðferð, greinargerð skipulagstillögunnar, umhverfisskýrslu og uppdrætti, á alls 7 blaðsíðum.

Skipulagsstofnun gerir ekki athugasemd við að skipulagstillagan verði auglýst skv. 31. grein skipulagslaga, þegar tekið hefur verið tillit til athugasemda og ábendinga stofnunarinnar. Að öðrum kosti ber sveitarstjórn að birta athugasemdir Skipulagsstofnunar með tillögunni á auglýsingartíma. Skv. 31. grein skipulagslaga „skal hverjum þeim aðila sem telur sig eiga hagsmuna að gæta gefinn kostur á að gera athugasemdir við tillöguna innan ákveðins frests sem eigi skal vera skemmri en sex vikur frá birtingu auglýsingar“.

Athugasemdir Skipulagsstofnunar eru í viðhengi.