Athugasemdir við grein Erlu Bil Bjarnardóttur í síðasta Bændablaði

Erla undrast það að ábyrg sveitarstjórn Mýrdalshrepps skuli ekki gleypa við tillögudrögum samgönguráðs að vegabótum í Gatnabrún. Tillögu sem laumað er inn án vilja og vitundar sveitarstjórnar og alls þorra hreppsbúa, til þess gerð að koma í veg fyrir að aðalskipulag hreppsins komist í framkvæmd.

Síðustu sveitarstjórnarkosningar snérust að mestu leyti um þetta mál. Þar fékk þverpólitískur flokkur, sem hafði það á stefnu sinni að koma láglendisvegi í framkvæmd og inn á aðalskipulag, fjóra af fimm sveitarstjórnarfulltrúum. Hefði sennilega fengið alla ef það hefði legið skýrt fyrir á stefnuskrá E-lista Einingar að það framboð væri í raun á móti aðalskipulaginu og framtíðar láglendisvegi.

Erla gefur í skyn að famkvæmd við aðalskipulagið og láglendisveg komist ekki inn á vegaáætlun fyrr en eftir 25 ár eða um árið 2037, en getur þess hinsvegar ekki að þetta eru einungis drög að tillögu til samgöngunefndar Alþingis, um hvað skuli sett inn á vegaáætlun. Alþingi hefur síðasta orðið og vonandi sér það við þessum kafbátahernaði lítils minnihluta sem kallar sig samtök íbúa og hagsmunaaðila í Mýrdal, samtaka sem þrátt fyrir smæð sína reyna að valta yfir lýðræði og vilja meirihluta íbúa hreppsins.

Við gerð aðalskipulags Mýrdalshrepps, sem verður að teljast framtíðarsýn og stefnumörkun hreppsbúa, voru til skoðunar fjórar veglínur. Þar var algjörlega hafnað þeim möguleika að lagfæra núverandi veg um Gatnabrún og Skarphól, sem þó var talinn ódyrasti kosturinn og átti að kosta um einn milljarð króna, eða álíka mikið og sjálf göngin í gegnum Reynisfjall. Aðrir agnúar á Gatnabrúnsleiðinni eru:

1. Hún er 4 km lengri en láglendisleiðin.
2. Hún er 100 metrum hærri, sem veldur meiri orkueyðslu ökutækja og getur munað um 2-3 km í láréttum akstri.
3. Hún getur verið miklu snjóþyngri og með slæmum sviptivindum.
4. Hún liggur í gegnum Víkurþorp og getur á engan hátt fullnægt þeim kröfum sem sveitarstjórn stefnir að og öryggisstaðlar krefjast um þjóðveg gegnum þéttbýli.
5. Það verða meiri náttúruspjöll á ræktuðu og ræktanlegu landi við að lagfæra og breyta Gatnabrúnsleiðinni heldur en vegna nýs láglendisvegar um ósbakka Dyrhólaóss.
6. Meðalumferð um hringveginn er, samkvæmt mælingum Vegagerðarinnar, um 500- 700 bílar á dag miðað við ársumferð. Miðað við 4 til 5 km. vegstyttingu er það svipað og tveir bílar ækju að nauðsynjalausu hringveginn um landið, dag hvern, og þar af 4. eða 5. hver bíll með 20 til 30 tonna hlass.
7. Núverandi vegarkafli er með um 56 vegtengingum við þjóðveginn. Þeim myndi fækka niður fyrir 15.

Þá er rétt að ítreka að þetta er ekki nýtt baráttumál núverandi sveitarstjórnar.

Árið 1982 þegar fjallað var um sameiningu Hvammshrepps og Dyrhólahrepps í núverandi Mýrdalshrepp, var gefinn út sameiningarbæklingur sem báðar hreppsnefndir stóðu að. Þar stendur:

„Gera þarf nýja samgönguleið um byggðina nær ströndinni meðjarðgöngum gegnum Reynisfjall og tengja þannig Víkurkauptún og dreifbýlið utan þorpsins enn betur en nú er.“

Þar segir einnig:
„Með jarðgöngum gegnum Reynisfjall væri rutt úr vegi einni verstu hindruninni vegna snjóa í vetrarsamgöngum á Suðurlandi allt til Hornafjarðar.“

Fjöldi samþykkta, ályktana og tillagna hefur verið samþykktur um þetta málefni síðan. Má þar nefna: vaxtarsamning Suðurlands frá apríl 2006, jarðgangaáætlun Vegagerðarinnar frá árinu 2000, ársþing Sunnlenskra sveitarfélaga allt frá árinu 2003 og öll ársþing síðan.

Á síðasta ársþingi SASS í október sl. var samþykkt áskorun um að setja nú þegar á næstu vegaáætlun fyrirhugaðan láglendisveg samkvæmt aðalskipulagi Mýrdalshrepps. Þá má einnig geta þess að fyrrverandi hreppsnefnd var búin að samþykkja þetta aðalskipulag.

Reynir Ragnarsson,
kt.160134-3139

(Var oddviti Hvammshrepps þegar Hvammshreppur og Dyrhólahreppur sameinuðust í núverandi Mýrdalshrepp árið 1983)

Greinin birtist í Bændablaðinu fimmtudaginn 24. nóvember, 2011