Tilfærsla á ströndinni við Vík er sú mesta við byggð sem þekkt er í heiminum. Til eru  mælingar á fjörunni í Vík sem ná aftur til ársins 1904, og sýna þær að landbrot átti sér stað frá 1904 til Kötlugossins 1918. Þá tók við tímabil söfnunar sem lauk um 1971  þegar landbrot hófst að nýju. Meðaltalstölur fyrir þessi 3 tímabil eru eftirfarandi:

• 1904 - 1918 landbrot 11 m á ári
• 1918 - 1971 söfnun 10 m á ári
• 1971 -2008 landbrot 9 m á ári

Sjávardýpið út af Víkurfjöru breytist samhliða landbroti og söfnun. Í kynningu Siglingastofnunar er sýnt hvernig sjávardýpið hefur breyst í áranna rás í sjö sniðum út frá fjörunni, snið O, A, B, C, D, E og F. Gula lína sýnir dýpið árið 2008 í öllum sniðunum.

Fjaran framan við Vík í Mýrdal er háð öldustefnunni (miðað er við gráður réttsælis frá norðri):

• Landbrot úr vestri - öldustefnan meiri en um það bil 193 gráður.
• Söfnun frá austri - öldustefnan minni en um það bil 180 gráður.

Til eru ölduspágögn samfleytt frá árinu 1958. Þær sýna að úthafsaldan sem brotnar við suðurströnd landsins er orkumesta alda á jörðunni. Öldumælingarnar sýna að ríkjandi öldustefna hefur verið suðvestlæg frá árinu 1971, enda hafa suðvestan umhleypingar verið algengir og þar með suðvestan brim. Einnig hefur aldan verið orkumeiri að meðaltali frá 1971 en á árunum fyrir 1971. Þetta tvennt gæti skýrt landbrotið sem hófst 1971. Á árunum þar á undan færðist ströndin út,  en þá voru austlægari áttir algengari. Æskilegast væri að öldugögnin hefði náð yfir lengri tíma.

Áætlun Siglingastofnunar um sjóvarnir við Vík hefur alfarið byggst á skýrslunni „Lágsvæði - 2. áfangi (2. hluti) Vík í Mýrdal. 1994".  Í skýrslunni er að finna tillögur um sjóvarnir í tveimur áföngum. Fyrri áfanginn er flóðvarnargarðurinn sem var byggður árið 1994. Annar áfanginn hefur ekki komið til framkvæmda en nú er komið að þeim áfanga, en í honum var lagt til að hækka flóðvarnargarðinn og styrkja, ef þörf krefur, með ölduvörn sem felst í grjótvörn utan á garðinum (sjóvarnargarður).

Í núverandi tillögum Siglingastofnunar, sem kynntar voru á íbúafundinum 12. febrúar, er gert ráð fyrir að styrking sjóvarna verði gerð í tveimur áföngum. Í öðrum áfanga verður núverandi flóðvarnargarður hækkaður um 1,3 metra og styrktur með ölduvörn sjávarmegin (sjóvarnargarður). Í þriðja áfanga verður sjóvarnargarðurinn fullbyggður með lengri og dýpri ölduvörn, en hæð garðsins verður óbreytt.

Ef Hringvegurinn verður lagður fyrir innan sjóvarnargarðinn í 50 metra fjarlægð eða meira leiðir það ekki til viðbótarkostnaðar við garðinn, en þá þarf íþróttavöllurinn að víkja.  Hefur kostnaður við það verið metinn á 150 mkr í frummatskýrslu Vegagerðarinnar.

Sjóvörn utan á þjóðvegi, þ.e. ef Hringvegurinn liggur í 6 metra fjarlægð frá garðinum, þýðir gjörbreytt mannvirki með mun öflugri sjóvörn. Til að  koma í veg fyrir ágjöf á veg þarf að breikka ölduvörnina og hækka garðinn um 4,6 m á þeim kafla sem vegurinn liggur að garðinum til að öryggi gagnvart ágjöf verði tryggt. Garðurinn yrði þá 5,9 m hærri en núverandi flóðvarnargarður. Ljóst er að þetta þarf að skoða frekar áður en kemur til framkvæmda.

Siglingastofnun hefur metið kostnað við mismunandi áfanga og útfærslur vestan Víkurár þannig:

Viðhengi:

Skrá	Lýsing	Skráarstærð
sigling_vik_120209.pdf	Íbúafundur í Vík 12. febrúar 2009, kynning Siglingastofnunar á sjóvarnargarði	2729 Kb

Umsagnir lögbundinna umsagnaraðila um tillögu að aðalskipulagi 2009-2025, sem borist hafa skipulagsfulltrúa Mýrdalshrepps, er að finna í viðhengjum neðst á þessari síðu. Lesendur eru hvattir til að kynna sér umsagnirnar vel. Skipulagstillagan í heild sinni er á vef sveitarfélagsins, www.vik.is.

Hér eru tilvitnanir í nokkrar umsagnir:

Umhverfisstofnun:

„Fram kemur að eitt af starfsmarkmiðum aðalskipulagsins 2009-2025 sé að: „það verði tekið tillit til stefnumörkunar Umhverfisstofnunar og náttúruverndar í héraði.″ Að mati Umhverfisstofnunar næst þetta markmið ekki og vísar stofnunin til framangreindrar umsagnar þar sem skýrt kemur fram álit Umhverfisstofnunar um staðsetningu veglínu fyrir væntanlegan hringveg um Mýrdal og í nágrenni Víkur.  Að mati Umhverfisstofnunar er ekki tekið tillit til þess álits stofnunarinnar að vernda beri svæði nr. 708 á náttúruminjaskrá og votlendi norðan við Dyrhólaós sem eina heild.″

„Að mat Umhverfisstofnunar er kosturinn Leið 3 óásættanlegur þar sem sú leið er mikið inni á svæði á náttúruverndarskrá.  Leið 3 virðist einnig brjóta gegn skipulagsreglugerð nr. 400/1998 en þar segir í grein 4.15 Vötn, ár og sjór í skipulagaáætlunum:  „Almennt er ekki gert ráð fyrir deiliskipulagningu þessara svæða en í deiliskipulagi aðliggjandi svæða utan þéttbýlis skal þess gætt að ekki sé byggt nær vötnum, ám eða sjó en 50 m og að ekki verði hindruð leið fótgangandi meðfram þeim″ .″

Vegagerðin:

„Til að verja Hringveginn nærri fjörunni [þ.e. Víkurfjöru, innskot] og tryggja þannig samgöngur um svæðið, þarf enn voldugri varnargarð, allt að 5m hærri en ella.  Hringvegurinn hefur sérlega stóru hlutverki að gegna varðandi flóttaleiðir við Kötlugos.  Vegagerðin telur umferðaröryggi vegfarenda síður tryggt verði Hringvegurinn sunnan byggðarinnar í Vík en ofan hennar.″

„Jafnframt skal vakin athygli á 29. grein Vegalaga nr. 80/2007:  „Ef þjóðvegi er að ósk sveitarstjórnar valin annar staður en Vegagerðin telur æskilegt og það leiðir til aukins kostnaðar er heimilt að krefja viðkomandi sveitarfélag um kostnaðarmun″.″

„Vegagerðin telur framlagða lausn umferðartæknilega ásættanlega en telur að skoða þurfi betur almannaheill, hagkvæmni og rofvarnir.  Vegagerðin telur veg ofan byggðarinnar í Vík á austasta hluta leiðarinnar ódýrari og jafn öruggan kost, þeirri leið má jafnframt áfangaskipta.″

Fornleifavernd ríkisins:

„Samkvæmt lögum á að fornleifaskrá allt sveitarfélagið á vettvangi fyrir aðalskipulag.  Svæðisskráning sem byggir á ritheimildum er ekki nægjanleg.  Ef ekki er hægt að ráðast í aðalskráningu fornleifa í öllu sveitarfélaginu vegna óskilgreindrar ástæðu ber að skrá fornleifar á þeim svæðum þar sem aðalskipulagstillagan gerir ráð fyrir að komið geti til jarðrasks.″

<!--[if !supportEmptyParas]--><!--[endif]-->

„Á bls. 12 í Greinargerðinni er tekið fram að fornleifaskráningu sé lokið í Vík og nágrenni.  Ekki hafa fundist skýrslur þess efnis hjá FVR. Útgefnar skýrslur eru aðeins tvær og ná yfir lítinn hluta sveitarfélagsins [...] ″

Landgræðslan:

„Ekki hefur verið leitað samráðs við Landgræðslu ríkisins á síðustu árum við gerð tillögu um aðalskipulag um þá fjölmörgu þætti í sveitarfélaginu er varða starfsemi stofnunarinnar og lögbundið hlutverk hennar″

Viðhengi:

Skrá	Lýsing	Skráarstærð
Umsögn Flugmálastjórnar		79 Kb
Umsögn Siglingastofnunar		118 Kb
Umsögn Vegagerðarinnar		35 Kb
Umsögn Landgræðslu ríkisins		939 Kb
Umsögn Fornleifaverndar ríkisins		402 Kb
Umsögn Umhverfisstofnunar		748 Kb
Umsögn Heilbrigðiseftirlits Suðurlands		281 Kb
Umsögn Landbúnaðarráðuneytisins		95 Kb